प्यूठान । लुम्बिनी प्रदेशका शहरी विकास तथा खानेपानी मन्त्री सरोज थापा (रोज राणा) ले प्युठानको बिकास र समृद्धिको लागि सबैले हातेमालो गरेर अगाडि बढ्नुपर्ने बताउनुभएको छ। बिहीबार नौबहिनी गाउँपालिकाको स्याउले स्थित एकता युवा क्लबले आयोजना गरेको १३ औँ वार्षिकोत्सव तथा भलिबल प्रतियोगिताको मन्त्री राणाले उद्घाटन गर्दै जिल्लाको बिकासको मुहार फेर्ने अभियानमालाई सफल बनाउन सबैको सहकार्य र समन्वय जरुरी रहेको बताउनुभएको हो ।

मन्त्री राणाले दम्ती–अधेरी सडकखण्ड कालोपत्रे कार्यको ठेक्का प्रक्रिया पूरा भइसकेको उल्लेख गर्दै केही दिनमै निर्माण कार्य सुरु हुने तयारीमा रहेको बताउनुभयो । अब प्युठानको मुहार फेर्न तेरो मेरो नभनिकन हातमा हात मिलाएर अगाडि बढ्नुको विकल्प नरहेकोले समय परिस्थिति अनुसार चल्नुपर्ने बताउनुभयो ।

मन्त्री थापाले सो अवसरमा पाडाबाङ पक्की पुल, मैरामारे माध्यमिक विद्यालय र मैरामारे प्रहरी चौकी सहित प्रदेश सरकारको बजेटमा निर्माण भइरहेको विभिन्न विकास आयोजना स्थलको स्थलगत निरीक्षण समेत गर्नुभएको थियो ।

गाउँपालिका अध्यक्ष दिलबहादुर थापाले मन्त्री थापाले विकास निर्माणमा देखाएको सक्रियता र परिणाममुखी पहलप्रति धन्यवाद समेत दिनुभयो। उहाँले अर्थपूर्ण बिकासको लागि संघ, प्रदेश र स्थानीय तह बीच समन्वय जरुरी छ । योजना बैक नहुदा योजनामा दोहोरोपन पर्ने भएकोले त्यसकोलागी योजना बैक बनाएर जानुपर्नेमा जोड दिनुभयो ।

कार्यक्रममा प्यूठान नगरपालिका उप–मेयर देवेन्द्र ब्रह्मा, झिमरुक गाउँपालिका उपाध्यक्ष प्रमोद पोख्रेल लगायत जनप्रतिनिधि तथा स्थानीयवासीको उपस्थिति थियो ।